Արցախցի երիտասարդ երաժիշտները ստացան պլանշետներ՝ իրենց մասնագիտական կրթությունը շարունակելու համար

«Մենք ենք մեր սարերը» զարգացման գործակալությունն ու Հովարդ Կարագյոզյան բժշկական բարեգործական հիմնադրամը «Ծնվել եմ Արցախում» կրթական ծրագրի 23 մասնակիցներին հանձնեցին պլանշետներ՝ նրանց կրթական հնարավորությունները ընդլայնելու և երաժշտական կրթությունը լիարժեք ապահովելու նպատակով։

«Ծնվել եմ Արցախում» 5-ամյա կրթական ծրագիրը նախաձեռնել է Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը։ Ծրագիրը, որն իրականացնում է «Արվեստ23» ՀԿ-ն, նպատակ ունի ապահովել Արցախից բռնի տեղահանված տաղանդավոր երաժիշտների մասնագիտական կրթությունը՝ տրամադրելով անհրաժեշտ ռեսուրսներ։ Ծրագրի շրջանակներում արդեն մեկնարկել են վարպետության դասընթացներ և օտար լեզուների ուսուցման պարապմունքներ։

«Շատերի համար պլանշետները ոչ միայն ուսումնական միջոց են, այլ նաև հնարավորություն՝ շարունակելու իրենց կրթությունը առցանց, քանի որ նրանցից ոմանք բնակվում են Երևանի սահմաններից դուրս կամ հեռու են կենտրոնից»,- նշեց «Արվեստ23» ՀԿ նախագահ Աննա Տեր-Հովակիմյանը։

Հովարդ Կարագյոզյան հիմնադրամը միացել է նախաձեռնությանը՝ կարևորելով երեխաների ոչ միայն ֆիզիկական, այլև հոգեկան առողջությունը։ «Երաժշտությունը բուժման մի ձև է, որը կարող է օգնել երեխաներին հաղթահարել իրենց կյանքի դժվարությունները», — ընդգծեց Հիմնադրամի ներկայացուցիչ Իրինա Լազարյանը։

«Մենք ենք մեր սարերը» զարգացման գործակալությունը շարունակում է աշխատել ծրագրի մասնակիցների համար անհրաժեշտ երաժշտական գործիքների ձեռքբերման ուղղությամբ, քանի որ նրանցից շատերը կորցրել են իրենց գործիքները՝ Արցախից բռնի տեղահանման հետևանքով։

«Երաժշտությունը այն ձայնն է, որը հնարավոր չէ լռեցնել, և մենք ուրախ ենք, որ այս ծրագրի օգնությամբ արցախցի տաղանդավոր երաժիշտները կշարունակեն հնչեցնել Արցախի ձայնը», — նշեց «Մենք ենք մեր սարերը» զարգացման գործակալության տնօրենի տեղակալ Նարինե Աղաբալյանը։ Նա նաև հույս հայտնեց, որ շատերն իրենց աջակցությունը կբերեն այս կարևոր նախաձեռնության իրականացման համար։

«Ծնվել եմ Արցախում» ծրագրի 23 մասնակիցներն ընտրվել են մրցութային լսումների արդյունքում։ Ծրագիրը նրանց հնարավորություն է տալիս ոչ միայն աճել որպես արվեստագետներ, այլև երաժշտության միջոցով պատմել իրենց հայրենիքի՝ Արցախի մշակութային ժառանգության մասին։