Ավարտվեց «Զվարճալի ֆրանսերեն» կրթական ճամբարը

Ավարտվել է «Զվարճալի ֆրանսերեն» ամառային 19-օրյա ճամբարը, որի ընթացքում Արցախից բռնի տեղահանված  9-15 տարեկան 34 երեխաներ  մասնագետների օգնությամբ խաղերի, երգերի միջոցով և այլ ինտերակտիվ մեթոդներով սովորել են ֆրանսերեն, հետաքրքիր ու հագեցած ժամանակ անցկացրել միմյանց հետ Երևանի «Երազ» ամառային այգում:

«Զվարճալի ֆրանսերեն» նախագիծն իրականացվել է «‎Մենք ենք մեր սարերը» կազմակերպության կողմից՝ Ֆրանսիայի «‎Սատար Արցախին» միության աջակցությամբ: Այն շարունակությունն է 2024թ. մարտ-հունիս ամիսներին  Երևանի Միսաք Մանուշյանի անվան թիվ 48 դպրոցի տնօրինության հետ համագործակցությամբ կազմակերպված ֆրանսերենի լրացուցիչ պարապմունքների, որի նպատակն էր օգնել 2023թ. Արցախից  բռնի տեղահանված երեխաներին  լրացնել կրթական բացը և կարճ ժամանակում յուրացնել ուսումնական ծրագիրը։