«Կենաց ծառ». Տաթևում պտղատու այգու հիմնման  բարեգործական նախաձեռնություն

Կարևորելով Ռուբեն Վարդանյանի նախագծերի և նրա բարեգործական առաքելության շարունակականությունը՝ «Մենք ենք մեր սարերը» զարգացման գործակալությունը`  համագործակցելով գործընկեր կազմակերպությունների հետ, սկսում է Տաթևում նոր պտղատու այգու հիմնման բարեգործական նախաձեռնությունը։ Ծառատունկն ու կանաչ գոտու ստեղծումն իրականացվում է Տաթևի վանքին և «ՏաԹևեր» ճոպանուղուն հարակից տարածքում:

Այգին կդառնա կյանքի և նոր սկզբի, իր ժողովրդի ու հայրենիքի բարգավաճման գործում Ռուբեն Վարդանյանի ունեցած ավանդի խորհրդանիշ, իսկ յուրաքանչուր ծառ կարտահայտի նախագծի մասնակիցների զորակցությունը Ռուբեն Վարդանյանին և Ադրբեջանում ապօրինի պահվող մեր մյուս հայրենակիցներին:

Նոր այգում նախատեսվում է տնկել 1 000 ծառ, այդ թվում՝ խնձորենի, տանձենի, կեռասենի և սալորենի:

Ծառատունկը մեկնարկել է ապրիլի 7-ին և շարունակվելու է ապրիլ ամսվա ընթացքում, իսկ մայիսի 25-ին տեղի կունենա այգու բացման հանդիսավոր արարողությունը։ Միջոցառման շրջանակում կտնկվի խորհրդանշական «Կենաց ծառը»՝ սոսին (չինար, տնջրի) որը հայերի համար սրբազան ծառ է և խորհրդանշում է տոկունություն, գթասրտություն, վեհանձնություն ու երկարակեցություն և որի հետ կապված հայոց պատմության մեջ շատ ավանդույթներ կան։

«Կենաց ծառ» նախաձեռնությունը յուրատեսակ վերադարձ է ակունքներին, ազգային ավանդույթներին՝ այնտեղից վերածննդի համար անհրաժեշտ ուժ, եռանդ ու հույս քաղելու համար։ Միջոցառման առանցքային տարր է ուխտագնացությունը դեպի հայության հոգեւորության, տոկունության և դիմադրության պատմական խորհրդանիշ հանդիսացող Տաթևի վանք:

Շնորհակալություն ենք հայտնում բոլոր աջակիցներին, ովքեր միացան այս նախաձեռնությանը:

Նախագծի շրջանակում հավաքված ողջ միջոցները կուղղվեն Տաթև
համայնքի զարգացմանը։