Եվս 46 բռնի տեղահանված արցախցի «Թևեր» ստացավ

Դիլիջանում ավարտվեց Մենք ենք մեր սարերը զարգացման գործակալության նախաձեռնած եռամսյա «Թևեր» վերականգնողական ծրագրի երրորդ փուլը։ Այս փուլում ծրագրին մասնակցել է Արցախից բռնի տեղահանված 6-18 տարեկան 29 երեխա և 17 ծնող։

«Թևեր» ծրագիրը համապարփակ վերականգնողական ծրագիր է՝ բաղկացած

սպորտային թերապիայից (ֆիթբոլ, ուժային եռամարտ, բակային խաղեր, շարժախաղեր), արտ-թերապիայից (ավազաթերապիա, թելերով պատմության ստեղծում) և ադապտացիայի, առաջնորդության և կարողությունների զարգացման դասընթացներից ։

«Անցյալ տարվա նոյեմբերին՝ բռնի տեղահանումից հետո «Մենք ենք մեր սարերը» զարգացման գործակալությունը ձեռնամուխ եղավ 4-18 տարեկան բռնի տեղահանված արցախցի երեխաների և նրանց ծնողների համար վերականգնողական ծրագրի իրականացմանը, որը մեզ համար շատ խորհրդանշական «Թևեր» անվանվեց։ «Թևեր»-ը շատ համահունչ է գործակալության ամբողջ մարդասիրական գործունեությանը և Ռուբեն Վարդանյանի ծավալած գործունեությանը դեռ Արցախում, իսկ այժմ նաև Հայաստանում»,- նշում է ծրագրի համակարգող, «Մենք ենք մեր սարերը» զարգացման գործակալության կրթական նախաձեռնությունների և մարդկային կապիտալի զարգացման գծով ղեկավար Սոնա Հովհաննիսյանը

Ծրագրին մասնակից երեխաներն իրենց ֆիզիկական և հոգեկան ռեսուրսները վերականգնելուց բացի, ձեռք են բերել նաև նոր հմտություններ և գիտելիքներ:

Համապարփակ մոտեցումը «Թևեր» վերականգնողական ծրագրի առանձնահատկություններից է․ այն երեխաների հետ աշխատանքին զուգահեռ նախատեսում է նաև ծնողների հետ աշխատանք, ինչը բարձրացնում է ծրագրի արդյունավետությունը և ամբողջական է դարձնում արդյունքը։

«Շրջափակումից հետո բռնի տեղահանությունը կրկնակի, եռակի կամ նույնիսկ քառակի էր դարձնում սթրեսը, ուստի՝ մեր հիմնական նպատակը եղել է հոգեբանական աջակցությամբ փորձել կայունություն պահպանել։ Առաջին փուլում հոգեվիճակի գնահատում ենք իրականացրել հոգեբանական   մեթոդիկաների միջոցով, ապա բաժանելով տարիքային խմբերի՝ իրականացվել է արտթերապևտիկ աշխատանք, և ոչ միայն», -ասում է ծրագրի հոգեբան Անի Ապիտոնյանը։

Ծրագրի շրջանակում ծնողները մասնակցել են անհատական և խմբային թերապիաների, ինչպես նաև սոցիալական կապերի ստեղծմանն ուղղված միջոցառումների՝ համատեղ ավանդական ուտեստների և քաղցրավենիքների պատրաստում, ճանաչողական էքսկուրսիաներ և այլն։

Ռուբեն Վարդանյանի հիմնադրած՝ «Մենք ենք մեր սարերը» զարգացման գործակալությունը ընդլայնում է «Թևեր» ծրագրի աշխարհագրությունը։ Ծրագիրն արդեն մեկնարկել է Գյումրիում։