«Մենք ենք մեր սարերը» գործակալությունը երախտապարտ է նվիրատուներին՝ Արցախի կողքին գտնվելու համար

«Մենք ենք մեր սարերը» տարածքային զարգացման գործակալությունը մշտապես կապ է պահպանում իր նվիրատուների հետ և  տեղեկացնում նրանց աջակցությամբ իրականացվող ծրագրերի ընթացքի մասին:

Սուրբ Զատիկի նախօրեին, ողջ հայության համար կարևորագույն հոգևոր կենտրոններից մեկից՝ Գանձասարից,  «Մենք ենք մեր սարերը» գործակալության  համահիմնադիր Ռուբեն Վարդանյանը, գործակալության մշակութային և կրթական ծրագրերի ղեկավար Նարինե Աղաբալյանը և Արցախի թեմի առաջնորդ Գերաշնորհ Տ․ Վրթանես եպիսկոպոս Աբրահամյանը տեսակապի միջոցով իրենց երախտագիտությունն են  հայտնել  գործակալության՝ տարբեր երկրներում գտնվող  աջակիցներին, որոնք օգնում են Արցախում տարբեր ծրագրերի իրականացմանը և  որոնց համար կարևոր է Արցախի ճակատագիրն ու ապագան:

Նարինե Աղաբալյանը տեղեկացրել է, որ «Նվերներ՝ Արցախի երեխաներին» ծրագրի շրջանակում  Արցախի շուրջ 12500 երեխաներ արդեն ստացել են իրենց  նվերները և շնորհակալություն է հայտնել բոլոր նվիրատուներին, որոնց շնորհիվ հնարավոր է դարձել ծրագրի իրականացումն Արցախի շրջափակման պայմաններում. «Շրջափակված Արցախում, որտեղ երեխաները տևական ժամանակ զրկված են եղել անգամ կրթության իրավունքից, նման ծրագրերի իրականացումն ու երեխաներին ժպիտ պարգևելn առանձնահատուկ խորհուրդ ունի»:

Ռուբեն Վարդանյանը նշել է, որ անհնար էր առանց  հուզմունքի տեսնել երեխաների երջանիկ դեմքերը և  կարևոր է համարել  նրանց ապագայի համար ներդրումների իրականացումը, քանի որ դա նշանակում է  ներդնել Արցախի ապագայի համար: «Հենց Գանձասարում այսպիսի միջոցառման անցկացումը չափազանց խորհրդանշական է, որովհետև պայքարը շարունակվում է. պայքարը շարունակվում է մեր երեխաների ապագայի, մեր հողում ապրելու իրավունքի, մեր կյանքը մեր օրենքներով ու ավանդույթներով ապրելու համար: Արցախում հավատում են ապագային և պատրաստ են դիմագրավել բոլոր դժվարություններին», — ասել է նա:

Տ․ Վրթանես եպիսկոպոս Աբրահամյանն իր օրհնության խոսքում նշել է, որ արցախցի երեխաների կողքին լինելը նշանակում է Աստծո կողքին լինել. «Մեր օրհնությունն ենք բերում բոլոր նրանց, ովքեր իրապես աստվածահաճո գործ են անում: Թող Տերը օգնական լինի բոլորիս, որ կարողանանք մշտապես սրտակից լինել միմյանց, որ Արցախում լինի կայուն խաղաղություն և հարատևություն»: